ગરબાડા તાલુકાના નીમચ ગામના વિક્રમભાઇ ફતેસિંહ આમલીયાર તથા તેના કાકાનો છોકરો અંકિત અને સંજય એમ ત્રણેય જણા તા.17મીના રોજ જીજે-20-એએ-9025 નંબરની મોટર સાયકલ લઇને દાહોદ બેન્કમાં પૈસા ઉપાડવા તથા ખરીદી કરવા માટે દાહોદ આવ્યા હતા. ત્યારે દાહોદમાં કામ પતાવી પરત ઘરે જતા હતા. ત્યારે સાંજના આઠેક વાગ્યાના અરસામાં દાહોદ ગરબાડા રોડ ઉપર મોટી ખરજ ગામે સામેથી આવતી જીજે-05-એયુ-9998 નંબરની બોલેરોના ચાલકે પોતાનું વાહન પૂરઝડપે અને ગફલતભરી રીતે રોંગ સાઇડે હંકારી લાવી અંકિતની બાઇકને ટક્કર મારી ત્રણેયને નીચે પાડી દીધા હતા.

જેમાં સંજયને પગે તથા શરીરે સામાન્ય ઇજાઓ તથા અંકીતને જમણા હાથે તથા ડાબા પગે ફેક્ચર તેમજ કપાળના ભાગે અને શરીરે ગંભીર ઇજાઓ થઇ હતી. અકસ્માત કરી બોલેરો ચાલક ગાડી લઇને ભાગી ગયો હતો. ઇજાગ્રસ્તોને તાત્કાલિક 108 દ્વારા દાહોદની ઝાયડસ હોસ્પિટલ ખાતે સારવાર માટે દાખલ કરવામાં આવ્યા હતા. આ સંદર્ભે વિક્રમ ફતેસિંહ આમલીયારે દાહોદ તાલુકા પોલીસ મથકે ફરિયાદ નોંધાવી હતી.