દાહોદ તાલુકાના દેલસર ગામના 40 વર્ષિય બાબુભાઇ નાનજીભાઇ ગણાવા તા.12મીના સાંજના સમયે છુટક મજુરી કરી પરત ઘરે જઇ રહ્યા હતા. ત્યારે નસીરપુર ગામે હાઇવે ઉપર કોઇ વાહનના અજાણ્યા ચાલકે અડફેટે લેતાં તેમને બન્ને હાથે, શરીરે તથા માથાના ભાગે ગંભીર ઇજાઓ થઇ હતી. અકસ્માત થતાં આજુબાજુમાંથી એકઠા થયેલા લોકોએ 108ને જાણ કરી ઝાયડસ હોસ્પિટલ ખાતે દવા સારવાર માટે ખસેડવામાં આવ્યા હતા જ્યાં સારવાર દરમિયાન તેમનું મોત નિપજ્યું હતું. આ સંદર્ભે અજાણ્યા ચાલક વિરૂદ્ધ દાહોદ તાલુકા પોલીસ મથકે ફરિયાદ નોંધાવતાં પોલીસે કાર્યવાહી હાથ ધરી હતી.